cucù

solita figura de memele de silvio.
doman, robichefarobe dipiazza, per copiarlo, ghe farà cucù a menja.
in cambio el ciaparà una pel muso...

--- so che no scrivo de tanto tempo. xè che sul lavor no go più internet, e de casa xè longhi... qua go la moglie che me rompi.
sul lavor nissun che me tazzi l'anima, qua invece mia moglie "e daghe de qua, e faghe de là, te son sempre sentà davanti ala television, mai che te fazessi un lavor a casa, xè de giustar el rolè" e bla bla bla...
sta meio i comunali in uficio che mi in saloto... ah, come che se ciama mia moglie? Bruna, ma da quando che la rompi cusì, tuti la ciama Brunetta! ---

idea per la soluzione del problema "veci"

intanto me scuso. tra el lavor, la pasqua, le elezioni, no go scrito gniente. anche Roby che fa robe xè stado in silenzio per un poco.
però el me ga scrito, riguardo a questo:

Risposta
Da Sindaco (il 05/03/2008 18.18.13)
Devo dire che c'è del talento, anche se non arrivi ai livelli di Miro. Visiterò il tuo blog non appena ho un secondo.

e anche

Risposta
Da Sindaco (il 05/03/2008 18.26.40)
In effetti ho già avuto modo di dichiararlo che è un talento.

adesso spero che el metti una bona parola con l'amico Tondo, che el me daghi l'asesorato regionale ale cazzade. se no el me racomanda lui, 'desso che semo amici, el posto no sarà mai mio; con tuta quela concorenza che xè...
bon.
comunque el tempo passa, ma el zervel qualcossa mazìna. semo restadi col problema dei veci a trieste.
e a mi me par che Roby la sta pensando ben ben.
go come l'impresion che questa commision de inchiesta su Casa Bartoli (vedi il picoglio) ga un dopio uso.
nel senso che se i coghi ga capido come far, Roby vol saver anche lù.
chi vuol intendere in tenda, i altri in saco a pelo.
ciau, Skatso
---
forsi la xè tropo forte? ho massimo rispetto per le persone coinvolte e sono estremamente dispiaciuto per l'accaduto. tuttavia lo spirito rimane su anche nei momenti brutti.

Tràfico, feriera e inquinamento

Intanto ciau Sindaco che te son in setimana bianca. noi poveri cristi semo qua in mezo ala nebia e ala spuza. bon per ti... bevi un vov caldo alla nostra salute in rifugio. e no un per tuti, intendo un per omo.
e zà che ti no te scrivi niente, scrivo mi qualcosa per tegnir el popolo de Tarieste su col moral...
insoma semo restadi qua con la spuza dei auti e dela feriera.
per intanto dovemo capir de dove che vien ste polveri piemedieci. mi digo che le pol vegnir de:
- dei auti (che savemo tuti che i spuza)
- dela feriera (che savemo tuti che spuza)
- dei veci coi capoti impolverai (che savemo tuti che... ve conto dopo)
analizemo i problemi.
per le spuze dei auti se podessi ordinar che la zente ghe meti nei scarighi un vaseto de vics vaporub. cusì inveze che spuza de solfo se sentiria per zità sto bon profumo de pino silvestre, che via rosseti ne pareria la val di fiemme. contenti tuti del profumo, sarìa contenta anche la vics.
per el camin dela feriera no so se se trova in comercio tuto sto vics, e alora 'sta idea bisogna scartarla.
altre idee: se podessi far in modo che ste polveri sia o massa più picie, cusì le centraline de piemedieci no le vedi più e noi gavemo el cuor in pase, o massa più grandi. per più grandi intendo no tipo sabia, che a noi triestini no ne piasi la sabia e preferimo i scoi de barcola o de sistiana, ma tipo grembani. prima de tuto te capisi subito che xè grembani dela feriera co' te li vedi e no servi zentraline, e dopo xè più fazili de ingrumar e portar via. se te ingrumi bastanza tochi te li pol doprar anche come material de costruzion. comodo.
opur, fermo restando che le tegnimo de grandeza piemedieci e che le soluzioni qua sora no funziona, se pol sempre meter un grando ventilator in zima del camin, in modo che distribuisi ste polveri no solo su servola e valmaura, che oramai i servolani e i valmauresi no i sa più 'ndove meterle, ma anche su zitàvecia, san giacomo, altura, caciatore, guardiela, opcina e tuti i altri rioni (meno che roiàn, che stago mi - grazie, in quela direzion faremo in modo de meter una paratìa). insoma un poco per omo e semo contenti tuti. che po' no xè gnianche giusto che solo i servolani e i valmauresi gabi le piemedieci. èco.
ultima roba, la più grave, xè 'sti veci incapotadi con capoti veci e impolveradi che i gira per Tarieste. primo i gira, i gira, e no i sa 'ndove 'ndar se no de 'ndar de cremcafè ale 8 de matina per bever un capo in bi cola pana. e duti sti veci coi capoti impolveradi che va a bever cafè ale oto de matina in piaza goldoni, i inquina!
domandèghe al Sindaco 'ndove e quando che xè el pico de piemedieci a Tarieste. ve digo mi! in piaza goldoni ale oto de matina, per colpa dei veci incapotadi coi capoti impolveradi.
'deso no savessi proprio come afrontar sto problema dei capoti. magari una tèsera sconto de upim "rotàma el tuo vecio capoto e sparagna el 20%", opur contingentar el numero de cafè de cremcafè, tipo massimo 100, cusì chi che riva tardi no trova cafè. insoma no so, 'iuteme scrivendo un comento. grazie!

desàign

go preparado 'desso quel che l'altro giorno no go rivado a far...
una picola modifica al sito... ve piasi el banner del sindaco qua sora?
disème, disème!
ciau a tutti!

la strategia

El signor Sindaco parla dela sua strategia. Alora: el meti Bucci in difesa, che xè un che ruca forte, Bandelli in centrocampo, che xè un che cori 'ssai, Lippi in ala (destra, oviamente).
insoma la strategia xè pronta:
- prèsing sui aversari (politici)
- fàlo sistematico sule questioni che no ghe centra
- portar, anzi contar, bale più posibile!
cossa? ah... strategia in quel altro senso... per Trieste e no per la Triestina? ah, go capido mal...

Comunque no capisso... el signor Sindaco va a parlar col sindaco de Lubiana e el se meti d'acordo per insegnarghe come brusar scovaze. Ma no sarìa meio che el sindaco de Bolzano vegni qua e ghe spieghi a tuti e dò che le scovaze xè meio recuperarle e doprarle de novo?
e dopo el parla de far vegnir i veci de Lubiana a veder i spetacoli del Rossetti. Ma se zà quei de Malchina no vien in teatro perchè no i trova parchegio... ara che i veci ga de vegnir fin soto l'entrata col'auto, sa? cossa, che i gaverà de perderse el primo tempo per zercar parchegio in via crispi?

E Venessia? Volemo far qualcossa con Venessia, sì!
Xè vizina sì Venessia, uh!, solo 150 chilometri!
Prova, prova a farli in treno!
Caro Sindaco, metite d'acordo per far vegnir de novo un treno direto che no se fermi per tuti i cantoni come un can che ghe tien de...
El Sindaco disi che Venessia no riva a tegnir tute le barche che riva, e che podessimo ciorse un poche noi.
ben, e noi 'ndove le metemo?
Venessia fa 425 crociere, 505 tragheti, 447 aliscafi all'anno. Noi co' gavemo una barca per setimana xè zà casin!
E dopo, sta zente, una volta che i smonta, pènsite: i ga pagà per 'ndar a Venessia e i se trova a Trieste (che insoma, xè bela ma no guanta el confronto), i vol veder Canal Grando e ghe toca veder el Canal de Ponteroso... insoma, che figura de drek femo?
Opur el Sindaco pensa de ciaparli tuti, meterli sul treno e mandarli a Venessia pasando per: Trieste Centrale, Miramare, Bivio D'Aurisina, Sistiana-Visogliano, Monfalcone, Cervignano-Aquileia-Grado, S. Giorgio Di Nogaro, Latisana-Lignano-Bibione, Portogruaro-Caorle, S. Stino Di Livenza, S. Dona' Di Piave-Jesolo, Quarto D'Altino, Mestre, Venezia S. Lucia???
Vedaremo, ga dito l'orbo...
ala prosima, ciau
Skatso

i comenti più bei

Insoma sto nostro sindaco ga scominziado a risponderghe a tuti. el diventerà mato. xè 200 e pasa comenti sul sito. se el perdi 5 minuti per ognidun, metemo che el staghi 3 ore al giorno (che de più te se rompi le "pelotas"), ghe vol una setimana intiera de lavor per scriverghe a tuti. se dopo el va a controlar per vero tute le robe che el segnala, roba che lui sempre disi "controlerò mi, andarò de persona, fazo tuto mi", ma come el farà? quante ore ga el suo orologio?
Comunque, sul sito tante robe xè scrite, e anche tante monade.

Le migliori monade

Domanda: sior sindaco, la me scusi, ancora per quanto tempo la pensa de contarnela?
Risposta: Cerco di essere preciso: fino al 24 aprile del 2011, quindi tre anni, due mesi e diciasette giorni.
RIDomanda: sior sindaco, la me scusi, visto che el suo mandato dura fin al 24 aprile del 2011( da oggi: tre anni, due mesi e diciasette giorni), la pensa de contarnela ancora per tuto sto tempo?
RIRIDomanda: sior che rispondi pe'l sindaco, la me scusi, la pensa de andar avanti tanto con sta pantomina?

Domanda: Caro Roby, son Ucio de Muja. Complimenti per el tuo novo zogo. Za che son volevo ricordarte la sera del 24 aprile del 1997. Te se ricordi. Ierimo a zena de amici comuni, i Postogna, me par. Là se gavemo conosù. A fine serata, dopo cicole ciacole e tante ridade (come te conti ti le barzelete non le conta nissun) e un poco tanto bevudi te me ga domandà in prestito una centona che te ieri restà senza un bel. Te le go dade. No le go più viste. No te go più visto. No vojo i soldi che son rico, ma almeno un saluto da questo tuo blok.
Domanda sula domanda: scusi signor Sindaco ma dei soldi de Ucio non se ga più savudo niente...

Mamma Fra invece, ga scrito el più bel comento fin 'desso, e alora lo copio qua soto che cusì se lo vedi due volte, che merita
Di Mamma Fra (inviato il 11/02/2008 17.57.25)

In questo mondo pieno di smog
un cosiglio che mi sta a cuore
Le voglio dare tramite bloog
affinchè aumenti "rispetto e amore".
A cosa serve il nostro vivere
se non per render miglior il domani?
...perciò ascolti questo mio scrivere
e aiuti il futuro di noi umani.
Oggi esiston mezzi e strumenti
per dare agli animali maggior dignità
per rispettare gli organismi viventi
e dare ai bimbi maggior sanità
Non Le insegno niente,
non ho tal presunzione
ma farebbe bene alla nostra gente
se già dall'infanzia si migliorasse l'alimentazione.
Allora per far crescere sani i bambini
per costruire un mondo migliore
potenzi con alberi i nostri giardini
e nelle mense porti il Biologico di rigore!!!
La pietra si consuma
le piazze muteranno
ogni idea è una piuma che in futuro cambieranno.
Tutto quello che alla fine rimane
è il nostro popolo su questo piccolo pianeta
"contribuisca a far crescer le persone sane
e le aiuti ad arrivare a questa meta"!

Tràfico

Eco, giusto! El piano del trafico, ghe voleva, perchè senò el trafico va pian. anche sul pian.
e sule rive? sule rive el va più pian perchè xè riva o se disi rive ma in realtà xè tuto drito?
però che presto che se riva, andando per le rive. perbòn!
e dopo... el fronte mare... ma el fronte mare? 'ndove 'l xè sto fronte mare?
no, me domandavo, perchè 'desso no se vedi gnianche el mar. se vedi solo auti che cori! e cossa ocori che te cori, co' no ocori che te cori? tanto sule rive te rivi presto anche andando pian, sa!
Ma mi lo go sentido sa, el Sindaco. Per telequatro el diseva "Per il fronte mare dobiamo guardare ale grandi cità europee... no so, mi viene da pensare a Viena, eco! Per esere proprio miteleuropei, dovremo fare un fronte mare come la cità di Viena, eco"!
E po' sta scatola con dentro el Magazino Vini. Pezo roba ciò!
Co'l xè rivado el Sindaco ga dito "lo buterò via in venti giorni"... sì, par fazile... ara che i triestini, per ste robe, i xè come i furlani, sa. No i buta via gnente! Anche perchè i pensa, o i spera, che sto Magazino Vini sia ancora pien! Per quel!!!
Che anche sto papa, no?, che Trieste sta col papa, no?, anche no!
I triestini, tra le popolazioni de tuto el mondo, xè i unici che i ga protestado co' i ga nominado el papa.
Forsi el Sindaco no sa, ma mi in osteria go sentido...
"Cossa? Benedeto Sedicesimo??? Poca roba xè sedicesimo... no iera meio Benedeto Otavo! Alora sì che me 'ndava ben... Benedeto Otavo... de Teràn magari"
Cordialmente vostro,
Skatso